Ezker Anitzak Europako Parlamentura eramando ditu Zubietako erraustegiaren gorabeherak

 Donostian, 2022ko irailaren 15an

Ezker Anitza-IU Gipuzkoak onartezintzat jo du erraustegiaren instalazioak martxan jarri zenetik dituen gorabehera ugarien aurrean, Gipuzkoako Foru Aldundiak GHK enpresa emakidadunari ez eskatzea bere kontratua bete dezala bere funtzionamendu egokia ziurtatzeko, ezta horren inguruan inolako zigorrik ezar ez dezan ere.

GuraSOS taldeak atzo Zubietako erraustegiaren transformadorearen behin betiko matxurari buruz zabaldu zituen azken informazioen ondorioz, Ezker Anitza-IUk uste du erakunde eskudunak ez direla neurri egokiak hartzen ari instalazio hori martxan jarri zenetik izaten ari diren gorabehera eta matxura ugariei aurre egiteko, horrek pertsonen osasunean eta ingurumenean izan ditzakeen ondorioekin.

Ezkerreko erakundeak gogorarazi du azpiegitura horrek, Europako araudiaren arabera, energia sortu behar duela, eta ez soilik hondakinak erre. Hala ere, egungo egoera da hondakinak errausten ari direla, aurreikusitako energia sarera isuri gabe. Egoera horrek erakusten du Gipuzkoako Ingurumen Gunea deiturikoa «bluf» bat dela, erraustegi zaharkitu batekin, eta ingurumen-arazoak baino ez dituela sortzen.

Ezker Anitzatik, Hondakinen Lege berria betetzeko deia egin nahi dugu berriro. Lege horren arabera, zatiki organikoa bereizi behar da, eta hondar-frakzioa behar bezala kudeatu behar da, hori abiapuntu egokia baita hondakinen kudeaketa jasangarria egiteko.

Transformadorearen behin betiko matxurari buruz atzo argitaratutako berriak argi uzten du instalazio hori ez dela aurreikusitako energia sortzen ari, behin-behinean jarritako transformadorearen ahalmena ez baita errendimendu osoan funtzionatuz gero ekoitzi beharko lukeen energiaren laurden batera ere iristen. Ondorioz, Zubietako erraustegia hori baino ez da, “hondakinak erretzeko planta bat, EBko zuzentarauek erabat debekatzen dutena”.

Gipuzkoako Foru Aldundia instalazio horren funtzionamendu egokiaren arduraduna denez, lehenik eta behin emakidadunari ezarritako kontratua betetzeko exijitu behar luke eta, hori egiten ez duenez, Ezker Anitzak dimisioa eskatu zuen joan den uztailean, bai GHK-ko zuzendariarena, bai José Ignacio Asensio Ingurumeneko foru diputatuarena. Hala eta guztiz ere, agintari eskudunek ez dute oraindik esku hartu, azpiegitura horren funtzionamendu eskasa agerikoa izan arren, eta azpiegitura horretan gauzatutako hainbat jarduketa ikerketa judizialen pean jartzen ari diren arren.

Horregatik guztiagatik, eta batez ere kontuan hartuta horrelako arazo handi bat ezin dela denboran luzatu, Ezker Anitza-IUk Zubietako erraustegiaren kasua Europako Parlamentura eramango du, bere funtzionamenduaren errealitatea zein den jakin dezaten, instalazioak Europako araudiak betetzen dituen ala ez erabaki dezaten. eta horri buruzko neurriak har daitezen.