Elkarrekin Donostiak hiriko etxebizitza babestuen parkea handitzea eta hutsik dauden etxebizitzak alokairu sozialera bideratzea eskatu du

Donostian, 2022ko ekainaren 17an

 

• Haizea Garay Ezker Anitza-IUko zinegotziak, Elkarrekin Donostia udal-taldean, osoko bilkurara eramango du hiri-lurzoruko etxebizitza-sustapen guztietan Babes Ofizialeko Etxebizitzetara bideratutako etxebizitzen ehunekoa handitzeko proposamena, egungo Babes Ofizialeko Etxebizitza-parkeak ez baititu betetzen Donostian dauden etxebizitza babestuen premiak eta eskaria.

• Era berean, Garayk Udal Gobernuari exijituko dio Etxebizitzari buruzko ekainaren 18ko 3/2015 Legean jasotako etxebizitza eskuratzeko eskubide subjektiboa blindatzea hirian, bai eta Donostian donostiarren oinarrizko eskubideen aurka egiteagatik gauzatu nahi den edozein espekulazio-proiektu baztertzeko ere.

   

  
  
  

Donostia aspaldidanik dago bizitegi-larrialdiko egoeran, eta arazoa larriagotu baino ez da egiten hotelen ugaritzearekin eta turismo-ostatuen tipologia desberdinekin. Horregatik, Haizea Garay zinegotziak aspalditik eskatu dio Udal-gobernuari 180 graduko bira eman dezala etxebizitza-politiketan, Euskadiko Etxebizitzaren ekainaren 18ko 3/2015 Legean jasotako helburu sozialari erantzuteko. Duela gutxi prentsaurreko batean plazaratu zituen neurrien barruan, osoko bilkurari helaraziko dio hiri-lurzoruko etxebizitza-sustapen guztietan babes ofizialeko etxebizitzen ehunekoa % 60ra igotzeko proposamena, Lurzoruaren Legeak ezartzen duen gutxienekoa baino % 20 gehiago; izan ere, “12.000 dira hirian dauden etxebizitza-eskatzaileak, eta ezin dute eskuratu bizitzeko sabai duina izateko oinarrizko eskubide hori”.

Garayk adierazi duenez, etxebizitza babestuaren eskaera handi hori kontuan hartuta, Gobernuak hiriko interes publiko orokorraren erdigunean jarri beharko luke etxebizitza horretarako sarbidea, eta ez luke erraztu behar hotel berriei eta bestelako turismo-ostatuei lizentziak ematea. “Hala ere, ikusten dugu Gobernuak interes publikoaren argudioa erabiltzen duela Donostian espekulazio-proiektuak bultzatzeko, baita auzoetako bizilagunen oposizioaren aurka ere; proiektu elitistak eta bereizleak, hiriko prezioak are gehiago garestitzen dituztenak eta donostiarren beharrei erantzuten ez dietenak, eta, beraz, interes orokorrekotzat justifikatu ezin daitezkeenak”, salatu du zinegotziak.

Ezkerreko alderdiko zinegotziak berriro gogorarazi du, Donostian babes ofizialeko etxebizitzen eskaria egon arren, “Gobernu honek bultzatzen dituen hirigintza-proiektuetan legeak eskatzen duen babes ofizialeko etxebizitzen legezko gutxienekoa baino ez zaiela eskatzen konpainia sustatzaileei, % 40 hiri-lurzoruan eta % 75 lurzoru urbanizagarrian, eta, batzuetan, zirrikitu juridikoak egiten dituela gutxieneko hori eraikitzetik salbuesteko; horrela, babes ofizialeko etxebizitzak egin behar dituztenak baino gutxiago gauzatzen dira. Hau da, Gobernua gutxiengo baten zerbitzura dago, etxebizitzarekin negozioa egin nahi duena interes orokorrari jaramonik egiten ez dion bitartean”.

Elkarrekin Donostiak argi utzi du etxebizitzen prezioek gora egin dutela, bai erosketan bai alokairuan, eta igoera horrek, gainera, Estatu osoko etxebizitzen prezioaren rankingaren lehen postuan jarri gaitu. Hori dela eta, “hurrengo osoko bilkurarako erregistratutako mozioan, Goiako gobernuari eskatzen diogu Plan Orokorraren berrikuspenean ezar dezala hiri-lurzoruko etxebizitzen sustapenek gutxienez eraikigarritasunaren % 60 babes ofizialeko etxebizitzetara bideratzea, hau da, Lurzoruaren Legeak ezarritako minimoa baino % 20 gehiago”.

Era berean, koalizio ezkertiarreko zinegotziak Goiako gobernuari eskatu dio “hirian espekulazio-proiektu oro geldiarazteko, donostiarren oinarrizko eskubideen aurka egiteagatik. Arte Ederretako Hilton hotela eta Manteoko Basque Culinary Center hotela bezalako proiektuek hiriaren elitizazioa bilatzen dute, aberatsentzako eta turistentzako hiria, donostiarren bizimodua garestitzen duena, euren auzoetatik kanporatuak izateraino”. Garayk esan du “iritsi de garaia donostiarren oinarrizko eskubideak blindatzeko”.

 

5.000 etxebizitza inguru hutsik

Ezkerreko zinegotziak, era berean, Udal gobernuaren inplikazio handiagoa eskatu du hirian kuantifikatutako ia 5.000 etxebizitza hutsak Alokabideren -Donostiako Etxegintza etxebizitza-sozietate publikoak kudeatzen duena- programan sar daitezen lortzeko. Programa horrek hutsak dauden etxebizitzak mugitu eta alokatzeko helburua du. Izan ere, “kudeatzen dituen etxebizitzen kopurua nahikoa ez izateaz gain, urtez urte etxebizitza horiek pixkanaka jaisten ari direla ikusten dugu”. Garayk adierazi duenez, gaur egun 283 etxebizitza baino ez dira kudeatzen, 2016ko 369 etxebizitzekin alderatuta eta “zifra horiek, argi eta garbi, ez dira nahikoak hirian dauden etxebizitza hutsen kopuru handiari dagokionez”.

Hori dela eta, aurkeztutako mozioan, Ezker Anitza-IUko zinegotziak Udal gobernuari eskatuko dio bere esku dituen baliabide guztiak erabiltzeko konpromisoa har dezala jenderik gabeko etxebizitza alokairu sozialera bideratzeko, Stop Desahucios bezalako plataformek eskatu duten bezala. “Gainera, Udal-gobernuak ez du horretarako lege-garapenik itxaron behar; izan ere, Euskal Autonomia Erkidegoko Etxebizitzaren Legeak baditu beharrezko eta berariaz zuzendutako tresnak jenderik gabeko etxebizitza horren mobilizazioa errazteko, eta dagoeneko aplika daitezke”, ondorioztatu du Garayk.