Ezker Anitza-IU Donostiak etxebizitzaren inguruko espekulazioaren aurkako premiazko neurriak hartzea eskatu dio Udal gobernuari

Donostian, 2022ko azaroaren 4an

Ezker Anitza-IU Donostiako batzarrak salatu duenez, Gros auzoko bizilagunak bizi duten berehalako etxegabetze egoera EAJ-PSE udal-gobernuaren politika baten emaitza da, etxebizitzaren inguruko espekulazio oldarkorreko merkatu baten alde egin baitu. Izan ere, Etxebizitzaren Euskal Legea 2015ean onartu zen, eta etxebizitzaren garestitasunaren arazoari aurre egiteko tresna nahikoak eskaintzen ditu, eta Goiaren gobernuak ez du horietako bat bera ere aplikatzeko interesik jarri.

Ezker Anitza-IU Donostiak dio Gros auzoko Berminghan 1, Zabaleta 55 eta Segundo Izpizua 2 kaleetako zenbait maizterren egoera, Inquilinos Azora eta Stop Desahucios plataformek berriki salatu dutena, Donostiako Gobernuaren jarduera faltaren ondorioa dela, bere garaian ez baitzuen inolako inposaketarik jarri putre funtsak hirian sartzea saihesteko. “Ohartu ginen Azorak Inmobiliaria Vascongada enpresaren etxebizitzak erosi zituenean; Azorak ez zituen luzaroan mantenduko maizterrak beren etxeetan, horrelako enpresen helburua etxebizitzekin eta etxebizitzen prezioekin espekulatzea baita. Haien asmoa, argi eta garbi, etxebizitzak hustea zen, haiekin etekin ekonomikoa ateratzeko, eta, orain, auzotarrak burofaxak jasotzen ari dira, errentamendu-kontratuen amaiera jakinaraziz”, erakunde ezkertiarretik adierazi dutenez.

Donostiako etxebizitzen prezioen igoera geldiezina dela eta, bai erosketetan, bai alokairuan, “gure hiria paraiso bat da etekin ekonomiko handiena lortu nahi duten enpresentzat, eta aspaldidanik bizi dugun espekulazio latz horrek eragina du prezioek gorantz jarraitzean eta etxebizitza donostiarrentzat luxu bihurtzean, eta, Groseko kasu honetan ikusten dugun bezala, putre-fondoa familia ez-kalteberengan jarduten ari den honetan, inor ez da libratzen egoera berean egotetik”, Ezker Anitza-IUtik azaldu dutenez.

Orain arte, Azorak 8 pertsona etxetik atera nahi ditu azaroaren 30etik abenduaren 31ra bitartean, eta beste 20 familia inguru mehatxupean daude, baina putre funtsak 20 bat etxe hustu ditu Donostian dituen 75 etxeetatik. Kaltetutako pertsonek 20 urte baino gehiago daramatzate beren etxeetan bizitzen, poltsikoetako hobekuntzak ordaintzen, eta Groseko batez bestekoaren oso gainetik dauden alokairuak ordaintzen, “baina ikusita dago funtsak etekin handiagoak lortzea espero duela, bestela ez lituzke etxetik kanporatuko”.

Ezkerreko erakundearen arabera, duela urte batzuetatik hirian dagoen bizitegi-larrialdiko arazoak larriagotu egiten du pisu turistikoak eta hotelak ugaritzen ari direlako eta putre funtsak etxebizitzak pilatzen ari direlako. Hori dela eta, berehala eta irmo jardun behar da. “Larrialdi klimatikoaren eta krisi energetikoaren testuinguru honetan, Donostia “merkealdian” dago beste latitude batzuetako aberatsek luxuzko etxebizitzak eros ditzaten hirian eta negu beroagoak igaro ditzaten hemen, ikusita baitago etxebizitza horiek aterako diren prezioak ez daudela donostiarren eskura. Sistema horretan, beti dago norbait gehiago ematen duena, eta orain klase ertain-altuko pertsonak ere etxebizitzaren inguruko espekulazioa pairatzen hasten dira. Luxu eta elitizazio horrek guztiak txanponaren beste aldean bizilagunen kanporatzea dauka”, Ezker Anitza-IU Donostiatik adierazi dutenez.

Donostiako batzarretik eskatu diote udal gobernuari esku har dezala gai horretan, etxebizitzaren arazoari aurre egiteko eta horren inguruan garatu den espekulazioa geldiarazteko; izan ere, horretarako tresnak ditu 2015etik, urte horretan onartu baitzen Etxebizitzaren Euskal Legea, hala nola etxebizitza hutsen erregistroa, etxebizitza hutsen kanona, erreferentziazko indizeko prezioen argitalpena, eta baita hutsik dauden etxebizitzen desjabetzea ere, bi urtetik aurrera. Eta, batez ere, Goiaren gobernuak dagoeneko jardun behar du, “onartezina baita horrelako etxegabetze isilak egitea; onartezina da herritarrek babesgabetasuna jasaten dutela funtsen eta/edo enpresen presioen aurrean, beren etxebizitzak borondatez utz ditzaten; baina onartezina da, era berean, donostiarrek erabateko babesgabetasuna bizi dutela etxebizitzaren inguruko espekulazio basatiko merkatu baten aurrean, EAEko legeak etxebizitza eskubide bat dela ezartzen duenean”.